India army ammunition depot catches fire, 17 killed: reports

معروف امریکی کمپنی ’اوبر‘ نے پاکستان کے مختلف شہروں میں ٹیکسی سروس کے بعد لاہور میں ’اوبر آٹو‘ کے نام سے رکشہ سروس کا بھی آغاز کردیا۔

کمپنی کی جانب سے جاری بیان کے مطابق رکشہ سروس کا افتتاح پنجاب انفارمیشن ٹیکنالوجی بورڈ کے چیئرمین عمر سیف نے کیا۔

رکشہ سروس کے افتتاح کی تقریب سے خطاب کرتے ہوئے عمر سیف کا کہنا تھا کہ ’اوبر آٹو جیسی سروسز کی جانب پیش قدمی اس بات کی عکاس ہیں کہ لاہور کی ٹرانسپورٹ انڈسٹری میں ٹیکنالوجی کی راہ استوار ہوچکی ہے، جبکہ اس طرح کی سروسز سے شہریوں کی آمد و رفت کو محفوظ، سستا اور آسان بنایا جاسکے گا۔‘

یہ بھی پڑھیں: اوبر کا کراچی میں سروس شروع کرنے کا اعلان

اوبر پاکستان کی جانب سے جاری بیان میں مزید کہا گیا کہ اوبر آٹو سروس کا بنیادی کرایہ 45 روپے ہوگا، جبکہ سواری کو اس کے علاوہ 4 روپے فی کلو میٹر اور ایک روپیہ فی منٹ کے حساب سے ادا کرنا ہوگا۔

ابتدائی طور پر لاہور میں اس سروس کو ایک ہفتے کے لیے مفت آفر کے ساتھ لانچ کیا گیا ہے، یعنی 17 سے 23 اکتوبر تک سروس سے فائدہ اٹھانے والے ہر شخص کو 80 روپے تک کی پانچ مفٹ رائیڈز دی جائیں گی۔

بیان میں کہا گیا کہ ’اوبر آٹو‘ کی رکشہ سروس سے جدید ٹیکنالوجی کے استعمال کے باعث موجودہ سفری آپشنز کو تبدیل کرنے میں مدد ملے گی، جبکہ اس سے سفر کو زیادہ محفوظ، پراعتماد اور کم خرچ بنایا جاسکے گا۔

مزید پڑھیں: ٹرانسپورٹ ایپ ’اوبر‘ پاکستان آنے کیلئے تیار

ڈان سے بات کرتے ہوئے اوبر کے ایک عہدیدار نے کہا کہ سروس کے لیے کمپنی ٹو اسٹروک رکشوں کو فور اسٹروک میں تبدیل کرے گی، جبکہ ڈرائیورز کو ایپ استعمال کرنے کی ٹریننگ بھی دی جائے گی۔

اوبر آٹو سروس سے مستفید ہونے کے لیے یوزر کو کسی بھی ایپ اسٹور سے ’اوبر‘ کی ایپ ڈاؤن لوڈ کرکے رائیڈ کی درخواست کرنی ہوگی۔

واضح رہے کہ اوبر نے تقریباً آٹھ ماہ قبل پاکستان میں لاہور سے اپنی ٹیکسی سروس کا آغاز کیا تھا۔

کمپنی نے 25 اگست سے کراچی میں بھی اپنی سروس کا آغاز کردیا ہے۔