یو بینک ہوم لون - گورنمنٹ مارک اپ سبسڈی اسکیم

لندن: ٹی ٹوئنٹی کرکٹ کی عالمی چمپین ویسٹ انڈیز کے کپتان ڈیرن سیمی نے ساتھی کھلاڑی کرس گیل کو صاف گو قرار دیتے ہوئے کہا کہ وہ اپنی بے باک گفتگو کے باعث میڈیا کا آسان ہدف بن جاتے ہیں۔

کرکٹ ویب سائٹ کرک انفو کے مطابق ڈیرن سیمی ورلڈ ٹی ٹوئنٹی میں فتح کے بعد پہلی دفعہ کرکٹ کھیلنے انگلش کاؤنٹی کلب ہمشائر پہنچے ہیں جہاں وہ نیٹ ویسٹ ٹی ٹوئنٹی ٹورنامنٹ میں شرکت کریں گے۔

ڈیرن سیمی کا کہنا تھا کہ 'میرے خیال میں لوگ کرس گیل کو بلاوجہ نشانہ بنا رہے ہیں وہ میری ٹیم کے ایسے ساتھی ہیں جن کی میں تعریف اور احترام کرتا ہوں، وہ فطری کپتان ہیں'۔

کرس گیل گزشہ دنوں آئی پی ایل کے دوران ہندوستان میں خاتون صحافی کے ساتھ نازیبا گفتگو کرنے پر تنقید کا نشانہ بنے تھے اس سے قبل وہ آسٹریلیا میں بھی ایسی صورت حال کا شکار ہوئے تھے۔

ویسٹ انڈیز کو دو دفعہ ٹی ٹوئنٹی کا عالمی چمپین بنانے والے سیمی کا کہنا تھا کہ 'گیل میرے لیے سب سے پہلے کرکٹ ہیرو اور محظوظ کرنے والے شخص ہیں لیکن لوگ بلاوجہ ان پرتنقید کرتے ہیں'۔

یہ بھی پڑھیں: کرس گیل کیلئے بگ بیش کے دروازے بند

آسٹریلیا کی بگ بیش لیگ کی ٹیم میلبورن رینیگیڈز نے کرس گیل کو نئے سیزن میں ٹیم کا حصہ نہ بنانے کا اعلان کیا تھا جہاں گزشتہ سیزن میں انھیں خاتون رپورٹر کو ہراساں کرنے کے الزام میں جرمانہ بھی کیا گیا تھا جبکہ دیگر ٹیموں نے ان کو لینے سے انکار کیا ہے۔

سیمی نے اپنی حمایت کا یقین دلاتے ہوئے کہا کہ 'میں کرکٹ کے میدان میں ان کی خدمات پر کرس گیل کی ہمیشہ حمایت کرتا ہوں'۔

ان کا کہنا تھا کہ 'میں مانتا ہوں کہ ہمارے اوپر ذمہ داری ہے اور لوگ دیکھتے ہیں لیکن میرے خیال میں کرس گیل بعض اخباروں کی سرخیوں کا نشانہ ہوتے ہیں'۔

ڈیرن سیمی نے ویسٹ انڈیز کرکٹ کے حکام اور کھلاڑیوں کو دعوت دی کہ وہ اپنی انا کو قربان کرکے خطے میں کرکٹ کے فروغ کے لیے کام کریں۔